2023-06

Humanities Journal of University of Zakho (القضية : 2) (الحجم : 11)

هەر ژ کەڤن وەرە، دیالۆگێ کاریگەری و کارتێکرنەکا مەزن ل سەر ژیانا مرۆڤی هەبوویە، ژ بۆ دروستکرنا پەیوەندیان و دەربڕین و پێکڤەگرێدانا بیر و باوەران و ئاشکەراکرنا نهێنیان د ناڤبەرا مرۆڤاندا. د زۆربەیا ژانرێن ئەدەبیدا، وەکو تەکنیکەکا هۆنەرییا گرنگ دهێتە هژمارتن، ڕۆلەکێ مەزن د تێکستێ ئەدەبیدا دبینیت و ئێک ژ تەکنیکێن هەرە گرنگ یێن داستانێ دهێتە دیتن. ڤەکۆلین ل سەر ئەڤێ گریمانێ هاتییە ئاڤاکرن کو دیالۆگا دەرەکییا نەڕاستەوخۆ د داستانا زەمبیلفرۆشا فەقیێ تەیراندا ڕۆلەکێ سەرەکی د بەرجەستەکرنا کارەکتەران و وەرارا ڕویداناندا دبینیت. د ئەڤێ ڤەکۆلیندا مە هەوڵدایە؛ بزانین ئایا بەرجەستەبوونا دیالۆگا دەرەکییا نەڕاستەوخۆ د زەمبیلفرۆشیدا بوویە ئەگەرێ دیارکرنا هەلۆیست و هەست و سۆز و هزر و بیرکرن و لایەنێ دەروونی و جڤاکیێ کارەکتەران یان نە؟ تا چ ڕادە دیالۆگا نەڕاستەوخۆ بوویە ئەگەرێ پێشڤەچوونا ڕویدانان و دیارکرنا نهێنیان؟ ڤەکۆلین ل ژێر ناڤونیشانێن (ڕۆلێ دیالۆگا دەرەکییا نەڕاستەوخۆ د داستانا “زەمبیلفرۆش" یا (فەقیێ تەیران) دا)، کەواتە ڤەکۆلین هەوڵدانەکە ژ بۆ دیارکرنا ڕۆل و گرنکیا دیالۆگا دەرەکییا نەڕاستەوخۆ د ناڤ داستانا "زەمبیلفرۆش"دا. ل دەسپێکێ ب کورتی باس ل مێژوو و ڕۆل گرنگی و ئەرکێ دیالۆگێ هاتییەکرن، پاشی باسێ دیالۆگا دەرەکییا نەڕاستەوخۆ د زەمبیلفرۆشا فەقیێ تەیراندا هاتییەکرن. د ئەڤێ ڤەکۆلینێدا ڕێبازا وەسفی شڕۆڤەکاری هاتییە پەیڕەوکرن. پەیڤێن سەرەکی: دیالۆگ، دیالۆگا نەڕاستەوخۆ، داستان، زەمبیلفرۆش، کارەکتەر.