Conference
2025
نواندنا دوالیزما ئەنیما و ئەنیمۆس د ئەفسانەیا شاهمارانێدا
2025-01
نەهەمین كۆنفرانسێ ناڤدەولەتییێ سەنتەرێ زاخۆ بۆ ڤەكۆلینێن كوردی - زانكۆیا زاخۆ
پوختە
بەرهەمێن هونەری بەرێ بنیاتێ خوه ل سەر دوو جەمسەران ئاڤا دكەن، ئه‌و ژی "هەست و هزر، دەروون و ڕوح" د ڕامانسازییا ئەڤێ چەندێدا، ئانكو گشت داهێنانێن مرۆڤی پشكه‌كن ژ پەیاما مرۆڤایەتییێ. ل ژێر سیبه‌را ئەڤێ هەڤۆكێ زانایێ دەروونناسییێ "كارل گۆستاف یۆنگ"ی پشكه‌كا نوی د كووراتییا دەروونێ مرۆڤیدا ڤەدیتییە و د تیۆرییا خوه‌دا ب "نەستێ كۆمێ" ناساندییە.ئەفسانە ب قودیكا نەستێ كۆمێ وەكو كەرەستەیەك پێشنیار كرییە و ب شێوەیەكێ پۆلبەندی پێشبینییا وێنەیێن تەرزێن بنه‌ڕه‌تی د ئەفسانە و ئەدەبیاتێدا كرییه.ئه‌ڤ كاره بەری هاتنا میتۆدۆلۆژیا و ڤەكۆلینێن دەروونی یێن مۆدرێن ل سەر ئەدەبیاتێ ئەنجامدایە و وەكو پزیشكەكێ پراكتیكی ب توندی ل سەر بنه‌ما و ستوونێن خوە جێگیر بوویه.ئەڤ ڤەكۆلینە ڕەهوڕیشالێن خوە ژ تیۆرا یۆنگی وەردگریت و ل سه‌ر ئاخا ئەفسانەیا كوردیدا شین دبیت.ڤەكۆلین ب ناڤونیشانێ "نواندنا دوالیزما ئەنیما و ئەنیمۆس د ئەفسانەیا شامارانێدا"یه.
تێكەلبوونا دەروونشیكارییێ د بەرهەمێن ئەفسانەییدا ڕۆلەكێ گرنگ د تێگەهشتنا كووراتییێن دەروونێ مرۆڤیدا دگێڕیت، ژ ئەڤێ گۆشەنیگایێ "ئەفسانەیا شاماران"ێ وەكو نموونەیەكا بەرچاڤ د كەلتوورێ كوردیدا هاتییە هەلبژارتن.ڤەكۆلین وەسان دیار دكەت كو ئەفسانە د فرەڕەهەندییا تەرزێن بنه‌ڕه‌تیدا نموونەیەكا دەولەمەندە، بەلێ سنوورێ ڤەكۆلینێ تەكەزێ ل سه‌ر بنەمایێ "ئەنیما ئانكو ڕوحا مێینە د دەروونێ زەلامیدا و ئەنیمۆس ب واتەیا ڕوحا نێرینە د دەروونێ ژنێدا" دكەت. هەروەكو نەخشەسازییەكا ناڤخۆی، ڕێنیشاندەر و پەیامگەهینەر د ناڤبەرا هەست و نەستێن مرۆڤیدا.ڤەكۆلین دەرازینكەكا گرنگە بۆ گەهاندنا مرۆڤی ب كووراتییا پارچەیێن دەروونی ب ڕێكا ئەفسانەیێ.دیسان ب ئەركێ بەرچاڤكرنا قۆناغێن وەرارا ئەنیما و ئەنیمۆس د گەشەكرنا دووالیانەی كەسایەتییێن سەرەكییێن ئەفسانەیا شامارانێدا ل گەل شڕۆڤكرنا گەشا یەكگرتن و هەڤسەنگییا ئەنیما و ئەنیمۆس د ئەفسانەیێدا.
د ئەنجامدا ئەڤ ڤەكۆلینە بزاڤێ دكەت كو پرەكێ د ناڤبەرا كەلتوورێ كوردی و تێگەهشتنێن هەڤچەرخ د زانستێ دەروونناسیێدا چێبكەت، چونکی ئەفسانەیا شاهمارانێ ڕۆناهییێ ددەتە سەر گەشا تاكبوونێ، یان تەمامبوونا دەروونی مرۆڤ د ژیانا خوەدا و بزاڤا ئەوێ چەندێ دكەت هەڤسەنگییێ د ناڤبەرا لایەنێن نێر و مێ یێن كەسایەتییا خوەدا دورست بکەت، ئەڤە ژی نیشان ددەت كو چاوا ئەفسانەیا فۆلكلۆرییا كوردی دشێت ببیته نموونەیا بەرجەستەكرنا گەشتەكا ئێكگرتنا ناڤخوییا دەروونێ مرۆڤی.
پەیڤێن كلیلی: كەسایەتی، دروون، ئەنیما، ئەنیمۆس، شاهماران.
Back